傳統婚嫁資訊(18) 見家長嘅時候要注意啲咩？

結婚除咗要準備婚禮上面嘅嘢之外，仲有一環都要特別準備，就係見家長喇，見家長嘅目的就係等雙方父母互相認識同埋互相交流對婚禮嘅意見，但當中又有啲咩需要特別注意呢？

-洽談禮金

常見問題︰女方要求嘅禮金高過新郎負擔

解決方法︰新娘可以預先同新郎溝通好禮金嘅數目，然後再同父母交待預算，等父母可以及早清楚了解，如果父母要求同新郎嘅預算相差太多，新郎可以嘗試坦承同女方父母解釋自己嘅能力冇辦法負擔，咁樣佢哋就會了解實況，同感受到你嘅誠意

-及早鋪排

常見問題︰雙方家長同新人嘅意見分歧

解決方法︰ 平時可以製造多啲機會令雙方父母見面接觸，例如︰大家一齊飲茶食飯，除咗可以增加好感之外仲可以多啲了解佢哋嘅意見，咁樣去到籌備婚禮嘅時候就可以事半功倍啦

-面子第一

常見問題︰雙方家長都堅持體面，跟足傳統禮節，令到新人覺得尷尬同唔愉快

解決方法︰ 一般長輩都希望做足全套結婚儀式，新人應該以重視佢哋意見嘅態度去解決，同時需要耐心向佢哋解釋你哋嘅諗法，同父母解釋咁樣會令自己覺得唔愉快，好多時大部份父母都會因為疼愛自己仔女作出讓步。如果父母依然堅持已見就不妨尋求專業人士幫手，例如︰大妗姐、wedding planner

-避免衝突

常見問題︰雙方家長見面時發生衝突，令到氣氛尷尬

解決方法︰ 新人應該立即調停，然後新娘新郎應該同自己父母了解引起衝突嘅問題所在，再由準新人一齊拜會對方家長，向佢哋多講好說話，商討協調好之後先至再次約雙方家長見面，而成個見面過程要由兩位新人做主導，亦可以適當地向長輩收集意見

Photo Credit︰centraltrustnet